Romans 10
1Mua e huriki a turagu, a maki a ngaru hatekea, a vasileki vakaroro na Vure, ge korimule e huriki a Iuda. 2A matakilaka vona, ri toni hateka ni muri maia a Vure. Pali i uka ma ri lohoka vona a dala ri gi ramaia. 3I uka ma ri lohoka vona a Vure i rata navai hita si gi malamala na matana, lakea i uka ma ri luhoi torea a Vure. Ri toni ni ramai a vinara ri gi malamala na matana Vure. 4Ngane, e huriki ri luhoi torea e Kristo ri malamala na matana Vure. I uka tara viri ge ramai lobo a vinara, lakea ge malamala na matana Vure.5 aA ta mavonga, a vuhuna e Moses i here hosi, e rei a viri i ramai lobo a vinara, a Vure bara i takia a bakovi malamala, i habi a nimahuri vakaroro vona. 6 bPali e Moses i here tabu na naro ni luhoi torea a Vure, si gi malamala, i here maea, “Naha ni luhoi maea, ‘E rei ge sike na hunu?’” I manga i maea, e rei ge sike, ge tuli purua e Kristo? 7“Naha ni luhoi tabu maea, ‘E rei a viri ge puru na lovo i marangeo?’” (I manga i maea, e rei a viri ge puru ge bole rike vilia e Kristo na tanga ne huriki ri mate pali?) 8Pali e Moses i ta maea tabu, “A nitana Vure i tabuli tabukoi vomu. I tabuli na ngavamu, i tabuli na hatemu.” A nita iea, a nitana ngava si gi luhoi torea e Kristo. Si taki tala vakaroro a ngava iea. 9I mavonga, na ngavamu o taki tala ne Isu ia a Bakovi Dagi vomu. Na hatemu, o luhoi torea a Vure i vakamahuri mulea na matenga, lakea a Vure bara i korimule ioe. 10E huriki ri luhoi torea e Isu na hatene ria, a Vure bara i taki ria ri malamala. E huriki ri ta tala na ngavane ria, ne Isu ia a Bakovi Dagi, a Vure bara i korimule ria. 11 cNi here na Hinere, i maea, “E huriki ri luhoi tora ia, i uka ma ri gi maruhu.” 12 dE huriki a Iuda, e huriki i uka ma ria a Iuda, ri palupulupu kunana. E Bakovi Dagi, a Bakovi Dagi ne huriki lobo. I hate balala, i kori kamumu e huriki ri gale lakea vona. 13 eNi here, i maea, “E Bakovi Dagi ge korimule e huriki lobo ri gale lakea vona.”
14Pali, ri gi gale navai a viri i uka ma ri luhoi tora ia ma? Pali ri gi luhoi tora navia a viri i uka ma ri longo ma a rana? Pali ri gi longo navai, i uka viri ge tovo ria? 15 fPali a Vure i uka ma ge rudu ria, ri gi vano, ri gi vara navai? A ngava ni here puru na Hinere i ta maea, “I namika hateka na tahuna a viri i bele i vara na Velenga Kamumu!”
E Huriki a Israel i Uka Ma Ri Bole a Velenga Kamumu
16 gPali e huriki a Israel ala kupo i uka ma ri longototo a Velenga Kamumu. E Isaia a propet i ta maea hosi, “Bakovi Dagi, i uka tara viri ge longo mai a ngava mi vakalongo ria vona.” 17I mavonga, e huriki ri luhoi torea a Vure na tahuna ri longoa a viri i vara na Velenga Kamumu ne Kristo.18 hPali ga nana, ri longoa pali, o i uka? I muholi ri longoa. A Hinere i ta maea,
“A Velenga Kamumu ni longo na tabeke lobo na malala;
a nitane ria i lakea na tanga lobo.”
19 iRe huriki a Israel, ri longokilalea a Velenga Kamumu, o i uka? Ri longokilalea, a vuhuna e Moses i here puru hosi, i ta maea,
“Ga rata mua mu gu masigoro ne huriki i uka ma ria a Iuda, i uka ma ria a kabu muholi.
Ga rata mua mu gu tahate vona a kabu mu pahaluhoi ta ri manga manga.”
20 jMuri e Isaia i ta kavakava, i ta maea,
“E huriki i uka ma ria a Iuda i uka ma ri viro iau, pali ri pugai iau pali.
I uka ma ri gale iau, pali a bele kavakava ne ria.”
21 kMuri e Isaia i taki virihi e huriki a Israel, i here maea,
“Na parava vakaroro a pesi a dava ni bole mule ria,
pali ri longotaro a ngava, ri gigi tora.”
Copyright information for
BNP